Petroskoiš ezmäižen kerdan mäni “Vepsläine kviz”
Karjalan rahvahiden sebruden pertiš mäni “Vepsläine kviz”. Sädi da vedi sen Karjalan Rahvahaližen teatran arvostadud artist Aleksandra Aniskina.
”Vepsläine kviz” mäni Petroskoiš ezmäižen kerdan. Kaiked kvizaha ühtni 8 joukud. Kaikuččes joukus oli 5 mest. Nene oma eri-igäižed ristitud vepsläižiden juridenke da toižiden rahvahiden ezitajad, kudambile om melentartušt vepsläine kul’tur.
— Minä meletan, miše kaik ozastui. Vepsläine kul’tur om mugoine bohat, miše sen polhe voib tehta küzundoid lopmata. Oliži hüvä, ku nece azjtego tegižihe tradicijaks, sanub Aleksandra.
Kvizan ühtnikoile tariž oli antta vastusid 50 küzundaha. Nene küzundad oli jagetud videhe turha: kümne küzundad kaikuččes turas. Kviz oli omištadud vepsläižile tradicijoile, veroile da aigtegoile.
“Vepsläižen kvizan” vägestajaks tegihe “Alaižed”-jouk. Sen ühtnikad oma vepsän kelen kursiden openikad, kudambad kävuba opendamha vepsän kel’t Karjalaižiden, vepsläižiden da suomalaižiden kel’keskusehe.
— Meile lujas tuli mel’he “Vepsläine kviz”. Kaik küzundad oliba melentartuižed. Oli miš diskutiruida. Kaikid jügedamb oli jäl’gmäine, videnz’ tur, jagasoiš ičeze tundmusil “Alaižed”-joukun ühtnikad Irina Popova da Nadežda Agapitova.
Niken ei kävund kvizalpäi lahjoita. Kvizan sädai Aleksandra Aniskina holdui siš, miše necil päiväl ristitud ei vaiše sanuižiba uzid tedoid, no mugažo lähtnuižiba kodihe čomiden lahjoidenke muštoks.
Uzištoid neciš temas voib lugeda mugažo venäks.
