Necen pätničan Šoutjärven eläjad keradasoiš vastusele “Kodima” -lehtesen radnikoidenke. Vastuz mäneb 13 časud päiväd Šoutjärven vepsläižes etnografižes muzejas.
— Völ muloi, lehtesen jubilevodel, tahtoim vastatas meiden lugijoidenke. Erazvuiččiden süiden taguiči radmatk ei ozastund. Meil om miš diskutiruida lugijoidenke, ristituil om kaičenus äi küzundoid lehtesen rados, sanub “Kodima”-lehtesen pätoimitai Galina Baburova.
“Kodima”-lehtez lähtleb eloho kerdan kus “Periodika”-paništos vodelpäi 1993. Sidä lugetas kaikiš vepsläižiden tradicionaližiš eländtahoiš.