Keviäl Karjalas täytty vägie pietäh tielöin kohendusruadoloi. Hiijensellän tiedy kohendetah Turvallizet hyväluaduzet tiet -prezidentan kanzallizen projektan mugah. Tämä tie yhtistäy Hiijensellän kylän da federuallizen A-121-juaman “Sortavala”.
Tienrakendajat jo ruvettih muaruadoloi: pannah uvvet peitto-ojatruvat, luajitah tien reunas olijoi haudoi.
— Tienrakendajat pannah kundoh ei vaiku tien pindua, ga luajitahgi riešuarat, azetetah tiemerkit da tienaijat, pannah uuzi avtoubusoin azetuskohtu, kirjuttau Karjalan piämiehen lehtistöpalvelu.
Kohenduruavot uskaldetah loppie vuvven 2024 ligakuun puolivälis.
Tänäpäi Hiijenselläs eläy enämbi 1 000 hengie, kyläs ollah laukat, päivykodi, tulipaloozasto da poštuozasto. Tiedy myöte Hiijensellän lapsii vietäh škola-avtoubusal Läskelän kylän školah.
Pitkänrannan okrugas pannah kundoh vie kahteh kyläh vedäjät tiet: Impilahteh da Harluh.
Tänävuon federuallizen programman kannatuksel Karjalas uvvistetah 117 kilometrii tiedy.