Kirjuta kirje Pakkasukole!
Pakkasukko on piälimäine Ven’an uvven vuvven tiedoiniekku. Häi eläy Velikii Ust’ug -linnas. Sie hänel on suuri muatila, kuduas on Pakkasukon kodi (sie on 12 pertii), suarnoin troppaine, sepän ruadoperti, poštu, talvisadu, zoosadu, nuoruparku, lambi, ilolaittehii, lapsien kižuandukohtu, kafe, hoteli da kai aptiekku.
Kirjuttua Pakkasukole voibi adresile 162390 Ven’a, Voulogdan aloveh, Velikii Ust’ug -linnu, Pakkasukon kodi.
Karjalas on oma Pakkasukko — Pakkaine. Häi eläy Anuksenlinnas. Pakkazeh nähte on oma legendu:
“Kerran, juuri talven allus, myöndyobozu oli kodimatkal ajajes Anuksenlinnah. Oli kova pakkaine, a yhtel kupčan akkal tuli aigu lastu suaja. Rodiihes terveh da vägevy brihačču, kudai vaikkani ajoi kodih da rubei itkemäh vaiku kodih tulduu. Vahnembat pandih hänele nimi Pakkaine. Häi rodivui kupčakse, oli ravei da vessel pruazniekois. Joga linnas, kuduas häi oli, häi kačoi zirkaloh da konzu häi lähti ielleh ajamah, hänen kuva tuli zirkalospäi da rubei elämäh täs linnas. Talven allus, 1. talvikuudu, konzu Pakkazel on roindupäivy, kai hänen kuvat lähtietäh Anuksenlinnah. Sie Pakkaine luadi kilboi, ku tovestella omua edusijua.”
Nygöi, omal roindupäiväl, 1. talvikuudu, Pakkazele gostih tullah suarnallizet tiedoiniekat — Pakkasukot kogo Ven’alpäi Anuksen linnan Pakkasukkoloin kižat -festivualih.
Sinägi voit tulla Pakkazelluo gostih libo kirjuttua hänele kirjaine, hyvitellä roindupäivänke da työndiä se poštači adresile 186000 Ven’a, Karjalan tazavaldu, Anuksenlinnu, Voiton 30-vuozipäivän uuličču, taloi 8.
Paiči Pakkastu Karjalas vie on toine Pakkasukko — Talviukko. Talviukko eläy ei muga loiton Petroskoispäi — Čalnas. Hänel, kui Pakkasukolgi, on suuri muatila, kuduas on Talviukon kodi, Lumikin dvorču, čuajutaloi, lava, taloin huonukset, ajokoirien huonukset, pohjoispedruloin fermu, saamelazien kylä, kafe da restoruanu.
Kirjuttua kirjaine Talviukole da hyvitellä händy roindupäivänke (pidäy sanuo, ku hänen roindupäivy on 9. talvikuudu) voibi adresile 186130 Ven’a, Karjalan tazavaldu, Priäžän piiri, Čalnan kylä, Talviukon muatila.
Kirjuta kirjaine talven tiedoiniekale da vuota hänelpäi vastavustu.
