“Periodikas” on piässyh ilmah “Karjalazen Kybenyön” veres noumeru, sit on lugiettavua kogo perehele.
“Kipinän” lugijoin joukos ainos pyzytäh ruavasgi rahvas. Perindöt, perindöllizien syömizien reseptat, sanaristakot – moizet materjualat kiinitetäh ei vaiku lapsien, ga heijän vahnembien dai buaboloin-died’oloin mieldy.
Löydyy mostu kiindožua sivua verehesgi noumeras. Tiijustatto lugijes, mittumii kätkylöi oli karjalazis talolois ennevahnas da mittumii kieldoloi oli perehel lapsen suaduu. A mustattogo buaban kiiselin maguu? Ku etto, ga “Kybenyt” mustoittau.
— Niilöile, ket suvaijah varustua syödäväkse-juodavakse midätahto uuttu, löydyy hyvän križovniekkukampotan reseptu, kudamah työndie meile meijän eräs lugii. Tädä kampottua hyvä juvva räkkisiäl, ga toinah nigo räkkii täl kezäl ei rodei, nigo križovniekkua, sanou “Kybenyön” toimittai Ol’ga Smotrova.
On pättäviä lugemistu školaniekoilegi, hyö mustoitetah školavehkehien karjalazii nimilöi, suajah kniigulapukkazet, kudamat avvutetah karjalua opastujes, vie opastujat suajah lahjoittua omile opastujile hyvittelykortit Opastajanpäiväkse. Joudaval aijal hyväkse mielekse lugekkua karjalazen klasikon Juakko Rugojevan suarnu. Vie tiijustatto täs žurnualas, kenbo on “Erinomaine olendo” da mittuine Eduard Uspenskoin kniigu on nähnyh päivänvalgien vienankarjalakse.