Periodika-kuštantamo esittäy interaktiivista näyttelyö “Karjalan rahvahan vanhat runot” Kalevalan mua -etnofestivalin finalissa. Tapahtuma pietäh tänäpiänä 13. kevätkuuta Piiterissä.
— Myö esitämmä omua interaktiivista näyttelyö “Karjalan rahvahan vanhat runot”. Šen iänityš valmissettih Karjalan anšijoitunuot artistat Aleksandra Aniskina ta Andrei Gorškov. Myö esiinnymmä Valentina Petrovna Mironovan kera (Karjalan tietokeškukšen Kielen, kirjallisuon ta istorijan instituutin vanhempi tietoruataja). Myö tahomma yksinkertasešti ta mukavašti kertuo Karjalan vaikiešta folkloriperinnöštä, kumpasen peruštehella oli ni kirjutettu Kalevala-runoelma, kerto Oma Media -portalilla Periodika-kuštantamon johtaja Natalja Sinitskaja.
Natalja kiinitti huomijuo šiih, jotta festivalissa on esillä kirjat “Runostarinat” ta “Runostarinat 2”.
— Še on yksi šuosituimmista Periodikan kaupallisista projektiloista. Enšimmäistä kirjua myö jo nellättä kertua julkaisimma ta “Runostarinat 2” julkasima kolmatta kertua, korošti Natalja Sinitskaja.
Tilaisuon ošanottajie vuottau rikaš tieto-ašieohjelma. Omie ruatoja esitetäh ekspertit Karjalašta, Moskovašta, Piiteristä, Leningradin alovehelta, Krimilta ta Komin tašavallašta.
Tilaisuon rajoissa pietäh etnofestivalin kilpailujen voittajien palkintoseremonija. Tämän vuuvven tulokšien mukah kilpailuohjelmah ošallistu yli 5000 ihmistä Venäjän eri paikoista. Kaikista enemmän ošallistujie oli Moskovašta ta Moskovan alovehelta, Piiteristä ta Leningradin alovehelta, Karjalan šekä Komin tašavalloista, Murmanskin alovehelta, Krimin ta Čuvašin tašavalloista.
Kalevalan mua -etnofestivali pietäh perintehellisešti vuosittain vuuvvešta 2006 alkuan.
Aihiešta voit lukie niise šuomekši, vepšäkši ta venäjäkši.