Karjalan tašavallan piirit liityttih Karjalan kanšallisen ta alovehellisen politiikan ministerijön yheššä Karjalaisien, vepšäläisien ta šuomelaisien kieliresurssikeškukšen kera pitämäh aktijoh. Kahešša netälissä koulut, päiväkojit, folklorikollektiivit, kurššien opaštujat, kulttuuritalot, etnokeškukšet ta toiset laitokšet piettih aktijon rajoissa karjalan tahi vepšän kielellä omissettuja tapahtumie: tuntija, konserttija, vaštautumisie, kilpailuja.
— Tänä vuotena kaikkieštäh oli vähemmän aktijoh ošallistumisen hakemukšie karjalaisilta ta vepšäläisiltä, ka tilaisukšien muotoja oli enemmän. Joka vuosi ilmeštyy mitänih uutta, mukavua. Kieliaktivistit näytetäh mitein šiirtyä tietoja vanhemmalta šukupolvelta nuoremmalla. Karjalan kielen netälin aikana kummaššutti Mujejärven piiri, kumpani netälin joka päivä piti minnih tilaisuon, šano Karjalaisien, vepšäläisien ta šuomelaisien kieliresurssikeškukšen spesialisti Alina Kartinen.
Vepšän kielen netälillä aktiivisimpina oltih Šuomelais-ugrilaini šekä Šoutjärven koulut.
Kaččuo, mitä oli pietty netälien aikana ta šuaha innoššušta karjalan kantakanšojen kielien kehittämiseh voipi keškukšen VK-šivulla, šinne on kerätty kaikki uutiset ta tapahtumat.
Netälit pietäh joka vuosi šulakuušša ta ne on omissettu Karjalan ta vepšän kirjakielen päivällä, kumpani vietetäh 20. šulakuuta. Tänä vuotena kirjakielet täyvyttih 35 vuotta.