Kuorilahen-kylän tutkimuš toi voittuo Viktor Vikulinilla
Viktor Vikulinin kirjuttama ruato “Unohettu kylä Kuorilakši. Viimeset elämänvuuvvet” voitti kilpailun Istorijallisen kotišeutututkimukšen paraš ruato -nominatijošša.
Yli kuuši vuotta on keštän Viktorin ahkera ruato arhiivatietojen, venäjän- ta šuomenkielisien artikkelien kera, tietojen eččimini internetistä ta tietopaperiloista.
‒ Konša ei tarvinnun enyä ruatoh lähtie, ni tuli äijän vapuata aikua ta mie rupesin keryämäh tietuo. Tahon aina kyšyö keltänih, a vet’ niketä jo ei ole. Kaikin mäntih tuonilmasih. L’us’a-naini šilloin šano, jotta mie mitänä en löyvä. A mie löysin kuin omie šukulaisie, niin ni hänen. Nyt ilman šitä ruatuo en ni vois elyä, šentäh kun yksin jäin, šano Viktor Vikulin.
Tutkimušruato on ainutluatuni, šentäh kun šen pohjana on Viktor Vikulinin omat muisselmat ta jotta tovistua ne, Viktor kyšeli toisien Kuorilahešta šyntynyijen ihmisien muisselmista.
Kuorilakši on Kiestinkin Karjalan hävitty kylä. Rahvaš elettih šiinä 1960-vuosih šuaten.
Pakauttelu Viktor Vikulinin kera voipi lukie täštä.
