Presidentinvaalit: kolmipäiväni iäneššyš alko Venäjällä
Presidentinvaalit alettih tänäpiänä 15. kevätkuuta Venäjällä.
— Huomenekšella kello 8 ovet avattih kaikki 464 iäneššyšpaikkua Karjalan tašavallašša, Karjalan keškušvaalilautakunta tiijottau omalla Vkontakte-šivulla.
Tällä kertua iäneššyš presidentinvaaliloissa muuttu kolmipäiväsekši. Še piätty pyhänäpiänä 17. kevätkuuta kello 20.00. Kolmipäiväni iäneššyš ei ole uutuš Karjalalla. Enšimmäistä kertua kolmipäiväset vaalit piettih tašavallašša vuotena 2020.
— Koissa iäneštämiseštä pitäy ilmottua paikalliseh vaalilautakuntah. Hakemukšien vaštahotto loppu 17. kevätkuuta kello 14.00, keškušvaalilautakunta šelittäy.
Presidentinvaaliloissa iänioikeuven šuanuot tällä kertua voijah iäneštyä verkošša.
— Karjalašša šähköiseh iäneššykšeh ilmottautu 46 108 iäneštäjyä, keškušvaalilautakunta lisyäy.
Iäneššyšajat etä-iäneššykšellä ta yleisillä iäneššyšpaikoilla ollah šamat. Iänioikevutta voi käyttyä kello 8.00—20.00 paikallista aikua. Još ihmini ei ehdi iäneštyä, hiän ei voi iäneštyä uuvveštah verkošša eikä vaalihuonehissošša.
Šähköisen iäneššykšen käyttö vaalipäivänä ei tarkoita, jotta ihmiset voijah iäneštyä vain verkošša. Ihmini iče piättäy, iäneštyäkö tavallisella tavalla tahi netissä.
Aihiešta voit lukie niise šuomekši ta vepšäkši.
