Necen voden keväden ezmäine ”Kipinän” nomer om lähtnu

Kor’kuvan pirdi Margarita Jufa. 6+

Keväz’kun kulehtesen nomer om vepsän kelel. Kut kaiken-ki sihe on pandud päazjan kevädehe sidotud materialad. 

Täl kerdal kulehtesen ezmäižel lehtpolel runon sijas voib löuta keväden primetoid, miččid oli kirjutadud rahvahas. Udes nomeras oma kaikenlaižed rubrikad: ”Tedat-ik tö?”, ”Kirjpalič”, ”Teiden ičetoi lehtpol’”, ”Pähkmed aivoile”. 

— Pigai tuleb sur’ praznik Äipäiv. Mö vaumičim materialan Äipäivän praznuičendan tradicijoiden polhe erazvuiččiš maiš, sanub vepsläižen nomeran keradai Galina Baburova. 

Necen materialan ližaks om pandud kuličan recept. Mugažo vereses “Kipinän” nomeras voib löuta mastar’-klassoid, kuvaozoitesid, erazvuiččid tegendoid. 

“Kipinä” vepsän kelel lenneb oigetud Karjalan školihe (3.-8. klassoihe), kus opetas vepsän kel’t. Mugažo uz’ nomer voib ostta ”Periodika”-paindištos.