Veri-ryhmän uuši al’pomi on valmis
Äijiäl-al’pomin yhekšän musiikkikappalehta voipi kuunnella verkošša. Veri-ryhmän enšimmäini al’pomi näki päivänvalon. Ryhmä esittäy etnošähkömusiikkie. Vanhoja lauluja kuuluu uuvvella tavalla.
— Myö tahomma yhistyä folk-musiikkie šähkömusiikkih, jotta enemmällä kuuntelijalla še olis mukava, šelitti ryhmän šoittaja Vladislav D’omin.
Ryhmäššä on nellä henkie. Grigorii Arhipov ta Maksim Sel’ugin vaššatah šähkömusiikista ta tallennukšešta, Vladislav D’omin šepittäy musiikkie ta šoittau viululla ta jouhikolla, Marija Timonen valiččou karjalankielisien laulujen tahi runojen tekstijä ta esittäy niitä.
— Myö jo antoma konserttija Petroskoissa ta erilaisissa festivaliloissa ta mukava on, jotta esitykših tulou uušie ihmisie ta hyö ei tiijetä toini toista, tutuššutah keškenäh konserttiloissa, lisyäy šähkömusiikin šoittaja Grigorii Arhipov.
Al’pomin esityš šuunnitellah viettyä Piiterissä ta Petroskoissa šulakuušša. Lisyä tietuo kaččokkua Veri-ryhmän VKontakte-šivulla.
