Openduzsessii om ”Kel’t ei jüged kandišta”-projektan üks’ päpaloišpäi, mittušt tegeb Vepsän kul’tursebr. Sille kuctihe Karjalan, Vologdan da Piterin agjoiden školiden opendajid, muzejiden, erazvuiččiden keskusiden da sebroiden ohjandajid, kudambad ičeze rados kävutaba vepsän kel’t. Kelen tedo kaikuččel om erazvuitte. Kaiked kursile tuli läz 20 mest.
– Mö vaumičim mugoižen openduzsessijan, miše nene ristitud paremba el’gendaižiba vepsän kirjkel’t, oiktemba kirjutajižiba sil, sanub vepsän kelen kursiden vedäi Ol’ga Žukova.
Sessijan täht hän vaumiči openduzkirjaižid vepsän kelen grammatikas. Vepsän kelen časud mäneba nel’l’ päiväd. Openduzsessijan programm om vaumitud nedalikš. Programmas mugažo om vastusid erazvuiččiden mastaridenke, kudambad starinoičeba rahvahan sädos, tätüižiden tegemižes, paginoid etnomuzikan oppijoidenke da äi tošt. Mugažo openduzsessijan ühtnikad mäneba ekskursijoile Karjalan Taidehmuzejaha, ”Kantele”-pertihe, konservatorijaha, ajaba Šoutjärven vepsläižehe etnografižehe muzejaha, Kalagen etnokeskusehe da Kiži-sarele.