Repol’an Karjalan käsitöitä opaššetah Petroskoissa
Šulakuun 7. päiväh šuaten Petroskoin kanšallisešša musejošša, Petroskoin yliopistošša šekä Innovatijoluomistyön nuorisokeškukšešša pietäh puuveššännän ta ompelun kurššija. Haukkašuaren kešäkoulun opaštajat ta partn’orit piettih luventoja internetissä ta nyt kerättih opaštujie ofline tuntiloih.
— Orlovin alovehen kanšanmuasteri, Karjalan puuleikkumisen tutkija Jurii Rjabinkin opaštau leikkuamah puušta ašteita. Jokahini voipi luatie lusikan, kupin, mal’l’an, priänikkämuuvvon. Ompelukurššija pitäy meijän partn’ori Natalja Denisova. Hiän opaštau ompelomah nais- ta miešpaitua, pukšuja, koštuo ta kertou paikoista, šano Trajektorija-fondin johtaja ta kurššien järještäjä Konstantin Petrov.
Tuntija pietäh joka päivä päivällä ta illalla. Kuršši on järješšetty Presidenttigranttien fondin kannattaman Repol’an Karjalan perintehelliset käsityöt -projektin rajoissa. Šaman projektin aikana vuuvven alušta vietettih online luventoja käsitöistä ta perintehistä.
Lisyä tietuo voipi šuaha saitilta.
