Onegan nuamijo: spektaklien kaččelu on alkan
Onegan nuamijo -teatterikilpailun rajoissa spektaklija ruvetah kaččomah šulakuun 8.—14. päivinä. Arvoštelijat valitah kilpailijaspektaklien parahie artistoja. Kaikkieštah kilpailušša on 13 nominatijuo.
— Kilpailu on artistan ruavon tärkie arvoššuš, jota pietäh joka vuosi. Näyttelijän neruo arvoššetah teatterikriitikon, taitotiijon kandidaatin, professorin, festivalien ekspertin Jelena Gorfunkel’in johtama ammatillini arvoštelijajoukko, kumpaseh kuuluu musiiki- , teatteritaitotietäjät, kritiikit, toimittajat, šekä näyttelijien arvoštelijajoukko, šelitti kilpailun järještäjä, palkintoseremonijan ohjuaja Snežana Saveljeva lehistötilaisuošša.
Vaštautumisella toimittajien kera kerrottih palkintoseremonijašta, kumpani pietäh šulakuun 15. päivänä.
— Seremonija on kirkaš teatteriesityš, kummaista valmissetah Petroskoin kaikkien teatterien näyttelijät. Myö valiččima ohjelmah entisien seremonijien parahat numerot ta tulouki yllätykšie. A ennein esityštä kaččojat šuahah nähä näyttelijie “Ruškiella matolla”, šitä pietäh peiliaulašša 15 minuuttie ennein seremonijan alkamista, šelitti ohjelman ohjuaja Gleb Germanov.
Tänä vuotena kilpailuh ošallistuu 40 henkie ta kahekšan spektaklien joukkuo. Parahien nimet ilmotetah šulakuun 15. päivänä juhlallisešša seremonijašša, kumpani pietäh Musiikkiteatterin lavalla (12+).
