Petroskoin valdkundaližen universitetan kirjištos mäni ”Lugem Kalevalan runoid” -konkursan ühtnikoiden pauklahjoičend. Täl kerdal konkursaha ühtni enamba 60 ühtnikad, heiden keskes oliba školiden da kolledžiden openikad, üläopenikad da aigvoččed ristitud, kudambil om melentartuz’ kelihe.
Täl vodel ”Lugem kalevalan runoid” -konkurs mäni jo kudenden kerdan da oli online-formatas. Ühteta konkursaha oli kebnas: pidi tehta videorolik ”Kalevala”-eposan runoiden lugemiženke än’heze da oigeta se elektronižele počtale.
Kut kaikuččen-ki voden, konkursas oli koume nominacijad: ”Kalevalan” runod vepsän, suomen da karjalan kelel.Jogahižes nominacijas oli koume igägruppad: 12—15 voččed, 16—23 voččed, 24 voččed da vanhembad. Kaikuččes nominacijas oli valitud vägestajad da lahjansajad.
— Minä kulištin, miše om mugoine konkurs i pätin ühteta sihe. Minä lujas navedin vepsläšt runotust, a ”Kalevala” om sur’kulu melentartuine runokirj, om kirjutadud čomal kelel, da minä nadeimoi konz-se lugeda sen lophusai, sanui ”Kalevalan” runod vepsän kelel” -nominacijan vägestai Nadežda Agapitova.
Pauklahjoičendan aigal vägestajad eziniba rahvahan edes valitud runoidenke, a ken ei voinugoi tulda Petroskoihe, heiden videorolikad ozutadihe surel ekranal kaikiden kacujiden täht.
”Kalevalan” runod karjalan kelel nominacijas vägestiba Jevgenija Kolesnikova, Darja Tarasova, Nina Grigor’eva, Pavel Lesonen, Zinaida Ust’ugova, Valentina Libercova da Marina Perttunen, suomen kelen nominacijas — Milana Pticina, Evgenii Lesonen i Ol’ga Hramcova. Nominacijas ”Kalevalan” runod vepsän kelel vägestiba Alina Bogdanova, Sofja Timoščuk da Nadežda Agapitova. Specialine lahj Petroskoin Valdkundaližen universitetan kirjištospäi sai Jelizaveta Karpova. Kaikuččele lahjansajale anttihe gramotat, kirjad da muštlahjad.
Konkurs mäni Karjalan Rahvalaližen da regionaližen politikan ministerstvan tugel.
Tulijal vodel linneb 190 vot ”Kalevalan” ezmäižen painusen päivaspäi, sikš ”Lugem Kalevalan runod” -konkurs lineb völ suremb da varastadas völ enamba ühtnikoid.