Karjalan šuvipuolella šuamah uušie tietoja
Karjalan etnokulttuurikeškukšien liitto “ECHO” viettäy harjotteluo etnokeškukšien spesialistija varoin. Še keštäy kolme päivyä ta šiinä ajašša kolmen pohjoispiirin kolme spesialistie käypi Aunukšen ta Priäžän piirien etnokeškukših, jotta tuttavuštuo, mitein etnoperinnön toiminta mänöy näissä piirilöissä.
— Etnokeškukšet, kumpaset ošallissutah harjotteluh opaštajina valmissetah parahien ruatoprojektien esittelyjä šekä vaššatah kyšymykših, mitein ruatua kulttuuriperinnön kera, mitein käyttyä šitä paikan kehitykšeššä, kuin kuččuo paikallisie eläjie toimintah, šelitti ECHO-liiton spesialisti Ol’ga Stepanova.
Harjottelu Karjalan eteläošašša on projektin alku, toini harjottelu pietäh pohjoispiirilöissä, šinne lähtöy opaštumah ta šuamah kokemušta Karjalan eteläpiirien keškukšien kolme toimijua. Lopušša hyö šuahah käytännöllisie neuvoja, kuin parentua ruatuo etnokulttuurialalla.
ECHO-liitto yhistäy Karjalan etnokulttuurikeškukšie ta pitäy toimintua Karjalan kanšojen perinnön šäilyttämisekši ta nykytärkemmäkši luatimiseksi.
