“Itä-Karjalan pakolaiset. Tie kotiin” on vuuvven 2020 paraš kirja
Kilpailun tulokšet ilmotetah joka vuosi Muajilman kirjojen päivänä. Tänä vuotena Karjalan vuuvven paraš kirja -kilpailuh ošallistu 68 kirjua. Kilpailun komiisi valičči voittajie kuuvvešša nominatijošša šekä ilmotti parahan kirjan. Niise seremonijašša annettih lahjoja ta diplomija erikoisnominatijoissa.
Periodika-kuštantamon kirja “Itä-Karjalan pakolaiset. Tie kotiin” ošallistu moneh nominatijoh ta piäsi Miun šeutu ta šen ihmiset- šekä Karjala -nominatijojen voittajakši. Kilpailun piäpalkinto täštä kirjašta niise myönnettih “Periodikalla”.
– Kiitän kaikkie, ket ruattih miun kera. Ruato ei ollun helppo eikä nopie. Olen iloni, jotta kaikki onnistu ta myö piäsimä šemmosih tulokših. Tämä kirja kertou ihmisistä ta on tarkotettu heijän jälkeläisillä šekä kaikilla ihmisillä, šano kirjan luatija, Karjalan kanšallisen arhiivan spesialisti Jelena Usačova.
– Kyllä, myö toivoma, jotta Itä-Karjalan pakolaiset -kirja piäšöy nominatijon laureatiksi, ke emmä vuottan, jotta še šuau ni piäpalkinnon. Niise on iloista, jotta Keittijöškuapin starinat -kirja tuli nominatijon lauretiksi. On tärkietä, jotta myö luajimma oman panokšen lapšien kirjallisuon kehittämiseh, korošti Periodika-kuštantamon johtaja Natalja Sinitskaja.
Lisyä tietuo Karjalan vuuvven paraš kirja 2020 -kilpailušta luve Oma Mua -lehen tulijašša numerošša.
