Vepsän kul’tursebran ”Kel’ — minun Kodima”-projektan abul da Karjalan pämehen grantoiden fondan tugel zavodi rata Fotostudii lapsiden täht. Tetab Karjalas i sen irdpolel vepsläine fotograf Ilja Timin vedäb mastar’-klassoid fotokuvan mödhe Karjalan nelläs školas, kus lapsed opendaba vepsän kel’t.
Ezmäine vastuz fotografanke mäni Šokšun školas. Mastar’-klassaha ühtniba vanhembiden klassoiden openikad. Vastusel Ilja ozuti ičeze fotoid da starinoiči openikoile fotokuvan sändoiš, kut tehta muga, miše foto oliži čomemb.
— Tehtes fotoid, mö kuvadam midä-se kaikid tärktembad, midä tahtoim snimda. Fotografan kaikid suremb vihanik om laškmuz’. Oleskeleb, ajad mašinal, päiv mugoine čoma om, päiväine paštab, avaidase čoma londuzkuva, no sinä meletad — konz tagaze ajaškan, tegen fotokuvan. No pörttes tagaze päiväine jo ei pašta. Ku luget ičtatoi sädairistituikš, pidab tehta foto sid’-žo, konz teile mi-se näguihe čomaks, – sanub Ilja Timin.
Ilja Timin mugažo ozuti lapsile dronoid i starinoiči, kut pidab niidenke rata tehtes videoid da fotokuvid. Jäl’ghe openduzčasud Ilja andoi openikoile tegendan — tehta kuvid, kävutades tedoid, miččid hö saiba. A jäl’ges hö ühtes fotografanke kacuiba kuvid, Ilja andoi lapsile nevondoid, kut tehta kadrad paremba.
Fotostudijan satuseks tuleb foto-ozuteluz ”Vepsläine mir modoiš”. Sikš Ilja openzi i ozuti lapsile, kut pidab tehta ristitun modkuva-ki.
Lopuks openikad saiba hüvän nevondan Ilja Timanalpäi — ”miše paremboitta satusen, pidab tehta joga päivän hot’ üks’ foto meletades süžetas, kompozicijas i ei varaita tehta vigoid”.