Vierahanvarani Karjala ilman rajoja!
Pakkaiskuun 20. päivänä ilmotettih Vierahanvarani Karjala -kilpailun 10 voittajua. Heijän luvušša on ni Vuokkiniemen kylätalon ruavon johtaja Julija Filippova.
Julija Filippovan projektin nimi on ”Vuokkiniemi – 400”, še voitti kilpailun Näyttökohte-nominatijošša.
–”Vuokkiniemi – 400” on matkuštamini vanhua runonlaulajien kylyä myöten. Šen tarkotukšena on tuttavuššuttua vierahie paikallisih eläjih, karjalan kieleh, perintehih, käsitöih. Karjalaisen kylän ainutluatuisuon šäilyttämini ta tovellisien elämäntapojen esittämini on Julijan projektin tärkie oša. Vuokkiniemi – 400–opašretki on čukeltamini tovelliseh karjalaiseh muajilmah, šano projektin luatija Julija Filippova.
Vierahanvarani Karjala -kilpailun tarkotukšena on ehottua epätavallisie idejoita turismin alalla, jotta matkuštajat jatkuttais tulla Karjalah niise šen jälkeh, konša rajat avatah. Tapahtuman jarještäjänä on Karjalan kehityškorporatijo Fakultet Z-bisnessikoulun yheššä.
Pakkaiskuušša kilpailun 10 voittajua ošallistuu opaššukšeh, kumpasešša ruvetah esiintymäh turismialan spesialistit, ta vielä kolme voittajua šuau kallehie lahjoja kilpailun partn’oriloilta.
