Vologdan agjan Babajevon rajonan eläjad todenzoitaba eloho melentartuižid projektoid, miččed om oigetud vepsän rahvahan kaičendaha. Sigä eläb ei muga äi vepsläšt – 400 mest. Kaita äjid tradicionaližid salištusid da veroid om kaik jügedamb. Vepsän kelel pagižeba vaiše rouhad ristitud, unohtase i vepsläižed sömižed.
Vodel 2021 Babajevon agjas eloho todenzoittas uz’ projekt “Vepsläine sömine. Baboilpäi vunukoile”. Se abutab popul’arizoitta vepsän rahvahan sömišt. Timošinon kul’turpertiš planuitas tehta interaktivine muzeihonuz, mitte omištadas vepsän rahvahan sömižehe. Täs ezitadas ei vaiše enččid kaluid da astjoid, mugažo planuitas tehta mastar’-klassoid, kus opetas vaumitamha erazvuiččid vepsläižid sömižid.
— Etnokul’turine keskusen pätegend om kaita i popul’arizoitta Babajevon agjan eläjiden rahvahiden kul’turad. Sur’ znamoičend anttas tradicionaližen vepsän kul’turan kaičendaha. Vepsläižihe sömižihe kaiken oli sur’ melentartuz’, no niiden vamičendan peitusid tedab vaiše vanh sugupol’v, sanub projektan tegii, vepsän kul’turan tundii Maria Smirnova.
Projekt abutab ühtenzoitta erazvuiččid sugupol’vid, vanhoid i norid ristituid. Projektan ühtnikad linneba sijaližed eläjad, a mugažo adivod Babajevon agjaspäi.