Vepsänkeližen Kalevalan prezentacii mäni Petroskoiš-ki
Karjalan Sebruden kodiš mäni uden vepsänkeližen Kalevalan (16+) prezentacii. Ezmäine vepsänkeližen Kalevalan prezentacii mäni sügüz’kun lopus Šoutjärven muzejas Loninan lugendad-konferencijal. Toine prezentacii mäni Petrsokoiš, Karjalan Rahvahiden sebruden kodiš.
— Kalevala om mugoine sur’ da tutab epos, mitte om kätud enamba, mi 60 kel’he. Nügüd’ neniden keliden keskes om vepsän kel’. Nece om lujas sur’ da jüged rad. Tahtoin sanuda sur’ spasib Nina Grigorjevnale. Minä olen ülev siš, miše Kalevalan versii vepsän kelel läksi meiden paindištos, sanui Natalja Sinickaja, Periodika paindišton pämez’.
Karjalan Sebruden kodihe kerazihe kaik vepsän kelen da kul’turan navedijad. Kalevalan kändai, tedodoktor da vepsän kelen tundii Nina Zaiceva starinoiči siš, kut mäni kändmižen rad.
— Pidädes kädes necen suren kirjan mö voim ülendadas sil. Nece znamoičeb, miše vepsän kel’ om eläb, sil oma kovad jured. Toivon, miše necidä kirjad lugeškatas, kävutadas openduses da elos, sanui prezentacijan aigan Nina Zaiceva.
Kalevalan kändmine om tehtud Vepsän kul’tursebran ”Kel’t ei jüged kandišta”-projektan ramkoiš, Karjalan pämehen grantoiden fondan raha-abul.
