Pietarin Inkerin mua -spektali näyttäy kaččojalla Pietari Šuuren ta Pohjoisšovan viettämisen aikoih. Kaččoja piäšöy Venäjän tärkiellä istorijallisella paikalla Inkerin mualla. Spektaklin tapahtuma on pieneššä kyläššä, kumpasešta otetah nuorie poikie šotah.
— Spektaklissa on äijän mukavie ohjuajan piätökšie, kuin esimerkiksi toičči myö kuulemma piäšankarin iänijä, kumpani pakajau perehellä. Še kuuluu šuomen kielellä. On niise tanššija. Artistat esitetäh omie roolija tuntehellisešti ta šitä koroštau ILMU-ryhmän musiikki, šano Prjalka-kanšalaisjärješšön projektin johtaja Tatjana Dobrodejeva.
Spektaklin peruštehella on inkeriläisie eeppisie runoja. Še oli jo näytetty Koštamukšen kouluissa ta nyt Vienan kylien Vuokkiniemen, Kalevalan, Jyškyjärven lapšet nähän še. Šen jälkeh teatteri esintyy Lietmajärveššä ta Soravalašša.
Esityšmatkojen aikana lapšet tuttavuššutah karjalaisih kylih ta niijen luovih ryhmih.
Spektaklin valmistamisen Prjalka-kanšalaisjärješšön etuštama Entoteatterin muajilman ympäri matka -projekti oli kannatettu Presidentin kulttuurialottehien šiätijöššä. Rodniki-teatteri toimiu ohjuajan Irina Ivanovan johtaman Puškinilla nimitetyššä koulušša Koštamukšešša. Vuokkiniemeššä spektakli esitetäh koulušša kello 11:30.