Petroskoissa piettih Kyykkä kašvattija varoin -projektin esittely. Projekti šai Presidentin granttifondin kannatušta ta šitä toteuttau Karjalan kyykkäfederatijo.
– Projektih ošallistuu Petroskoin 16 päiväkotie. Šamoin myö šuunnittelemma matkoja Aunukšeh, Karhumäkeh ta Šuojärveh. Päiväkotiloissa myö piemmä muasteri-oppija, opaššamma kašvattajie peluamah kyykkäh ta lahjotamma varuštehie pelie varoin. Šen lisäkši projektih ošallistuu Puškin-kaupunkin etuštajie. Projektin mukah šuunnittelemma luatie 60 kokomušta ta opaštua 120 kašvattajua, jotta šiitä hyö iče voitais opaštua lapšie, šano projektin johtaja Anna Šliburene.
– Esittelyššä mie kerroin kyykkä-pelin šiännöistä, kyykkäkentäštä ta tarvittavista varuštehista pelie varoin. Nyt myö piätämmä, min kokosie kyykkä-varuštehie meijän pitäy tilata, kerto federatijon piämieš Jevgenii Karakin.
Nyt projektin ruatajat šuoritetah kaikkie valmissuštöitä, kehitetäh opaššušohjelmua kašvattajilla. Projekti toteutetah 2022 vuoteh šuaten.