Paraš vuuvven kašvattaja on valittu
Eklein oli ilmotettu Vuuvven kašvattaja – 2023 -kilpailun tulokšet.
Vuuvven kašvattaja – 2023 -kilpailun Muamonkielen opaštamiseh oikeutettu kašvattaja -nominatijoh otti ošua Karjalan kolme kašvattajua, kumpaset opaššetah lapšilla muamonkielie. Hyö ollah livvinkarjalan opaštajat Natalja Romanova Aunukšen Zv’ozdočka-päiväkojista ta L’udmila Blinkova Aunukšen Raduga-päiväkojista šekä šuomen kielen opaštaja Svetlana Kobeleva Petroskoin Lumikello-päiväkojista.
— Ošallistujien piti piäššä šeiččemen ammattitestaukšen läpi. Esimerkiksi, Internetti-portfolio-tehtäväššä arvoššettih kašvattajien internetti-resurssija, a Mie ole opaštaja -tehtäväššä kačottih kašvattajien valmistamie videota, missä hyö esitettih omua ammattitoimintua, šuavutukšie ta harraššukšie. Šamoin kilpailun aikana kašvattajat kerrottih omista metodisista ta pedagogisista ohjeista, vaššattih arvoštelijien kyšymykših ta ošallissuttih pedagogisih debattiloih, kerto Karjalan opaššukšen kehityšinstituutin metodisti Ol’ga Hramtsova.
Mukavin ta tärkein tehtävä oli “Pedagogini toimenpito lapšien kera”, kumpasen aikana tarkaššettih kašvattajien tuntie muamonkieltä opaštujien lapšien kera. Niitä vietettih Lumikello-päiväkojin tiloissa.
Kilpailu-tehtävien jälkeh arvoštelijat koroššettih, jotta kaikki ošanottajat esitettih korkeita ammattitaitoja. Šiitä hyö ilmotettih kilpailun tulokšet, kumpasien mukah L’udmila Blinkova voitti Etnokulttuurisen perinnön šäilyttämini-nominatijošša.
A Muamonkielen opaštamiseh oikeutettu kašvattaja -nominatijošša voitti Lumikello-päiväkojin musiikkijohtaja Svetlana Kobeleva. Šamoin hiän šai Vuuvven kašvattaja – 2023 -kilpailun II aštehen diplomin.
— Mie kučuin lapšie musiikkimatkah, mi oli täyši šuomelaisie lauluja ta tanššija, kevätmečän iänijä ta kantelen šävelmie. Kašvatit iče ei huomattu, kun opaššuttih šoittamah kantelella šekä matkimah kontien ta kontienpojan liikkehie ta iänijä. A mie autoin lapšie– viritin heijän korvat ta šormet tarvittavah tahtih, ritmih ta mielialah, kerto omašta tunnista lapšien kera Svetlana Kobeleva.
Nyt Svetlana Aleksandrovna rupieu esittämäh Karjalua Venäjän ammattikilpailušša “Paraš muamonkielen ta -kirjallisuon opaštaja 2023” Parahat praktiikat, mit kehitetäh päiväkotien kašvattajien muamonkielen taituo -nominatijošša. Še pietäh tämän vuuvven šyyškuušša Karačajevo-Čerkesijašša.
