Tokion olimpijakisojen voittaja taekwondourheilija Vladislav Larin šai tašavallan korkeimman palkinnon – Sampo-kunnivomerkin Karjalan piämiehen kiäštä. Juhlallini seremonija piettih elokuun 6. päivänä Karjalan kanšallisen musejon Aateliskokoukšen šalissa.
– Olimpijakisojen korkein palkinto on ijäkši, korošti seremonijašša Artur Parfenčikov. – Mänöy šata vuotta, ka Vladislav Larinin nimi jiäy Karjalan ta Venäjän istorijašša.
Šamoin Sampo-kunnivomerkki oli myönnetty ni Vladislav Larinin valmistajalla Sergei Petrovilla. A taekwondourheilijan vanhemmat Vladimir ta Ol’ga Larinit šuatih kunnivomerkki “Panokšešta Katjalan tašavallan kehitykšeh”.
Ennein oli ilmotettu, jotta Tokion olimpijakisojen voittaja taekwondourheilija Vladislav Larin šuau kahen miljonin valtijonstipentin Karjalan halličukšelta. Šen lisäkši Kontupohjan olimpijareservin opistolta urheilija ta hänen valmistaja šuatih 500 tuhatta rupl’ua jokahini.
Heinäkuun 27. päivänä Tokion olimpijakisoissa Vladislav Larin voitti kilpailijan Makedonijašta 15:9 -tulokšella. Še on Venäjän toini kultamitali taekwondo-urheilulajissa koko olimpijakisojen istorijašša.