Norid da üläopenikoid kuctas ühtnemaha openduzsessijaha
Petroskoiš 6.–8. sulakud mäneb ”Openduz – tedod”-sessii üläopenikoiden da noriden täht. Programmaha mülüba openduzčasud projektan mödhe, akt’oran mastaruden da scenan paginan mödhe, a mugažo mastar’-klassad tradicionaližen kul’turan polhe.
Suomalaiž-ugrilaižiden rahvahiden liga todenzoitab eloho projektan ”Openduz – tedod: kehitoitusen platform” Karjalan pämehen grantoiden fondan tugele. Projektan aigan Petroskoiš tehtas openduzsessii üläopenikoiden da noriden täht, kelle om 18-35 vot. Sessii linneb melentartušt kaikile, ked oppiba Karjalan igähižiden rahvahiden istorijad, tradicijoid, elod. Se mäneb 6.-8. sulakud Rahvahiden sebruden kodiš. Sessijan programmaha mülüba kut openduzčasud, muga kul’turprogramm-ki.
— Radaškab koume sekcijad. Ezmäine linneb projektoiden polhe. Sen vedäškan minä. Voib olda ken-se tuleb jo projektan idejanke i mö kehitoitam sidä, vai mö ühtes zavodim ecta idejad, mittušt voiži todenzoitta ühtnikan rajonas vai Karjalas. Aleksandra Aniskina opendab norid akt’oran mastarudele da scenan paginale. Mugažo ühtnikoiden täht tehtas mastar’-klassoid i opetas heid vändmaha rahvahan vändimil, starinoiči ligan pämez’ Anna Anhimova.
Miše uhteta openduzsessijaha, pidab oigeta pakičuz adresadme keväz’kun 31. päivähasai.
Projekt tehtas Opendajan vodel, sikš homaičuz anttas ezmäi kaiked oppindtöho. Sessijan ühtnikad starinoičeškaba Karjalan kodi-istorijan tundijoiden da tedomehiden polhe. Satuseks tuleb biografine vajehnik, kuna mülüškaba kaik ühtnikoiden dokladad.
