Karjalan Rahvahan liitto ta Karjalan kanšantaijon ta kulttuurialottehien keškuš vietti uuvvissetušša Petrovskii-kulttuurikeškukšešša lyhyijen luventojen ilta. Ne oli omissettu Karjalan kantakanšojen perintehillä.
Karjalan kanšantaijon ta kulttuurialottehien keškukšen piäspesialisti Ol’ga Husu kerto talonpoikien muotišiännöistä ta näytti Kalevalan karjalaisen puvun. Šillä hiän kerto mitä pantih piällä, mi oli pukuošien merkityš, mimmoset kankahat oltih arvošša. Luvennon lopušša hiän korošti, mimmosie virheitä ei šua luatie, kun panet puvun piällä — panna ruškeita lenttoja očan kešellä, jättyä jalat ilman pitkie šukkie ta pityä tuohikoruja.
Arhippa Perttusen šiätijön jäšen Julija Filippova esitti karjalaisen keittijön erikoisukšie: mimmosie kala- ta lihašyömisie oli stolalla, mimmosie sriäpnöjä ta jälkiruokie.
— Mie iče tykkyän karjalaisie šyömisie ta tahon kertuo niistä ta luatie karjalaista keittijyö šuosutuimmakši Karjalan eläjien ta vierahien kešen. Ihmisie kiinnošti eniten, mitein luatie avonaisie kalakukkoja, šemmosie monet nähtih enšimmäistä kertua, šelitti Karjalaisen keittijön erikoisuot -luvennon lukija Julija Filippova.
Kolmannen luvennon esitti Istorijallisien tietojen kandidatti, Nuorien tietomiehien neuvošton puhienjohtaja Sergei Minvalejev. Hiän šaneli Karjalan arvautukšista. Kaččojilla oli mukava kuunnella ta hyö kerrottih omista muisselmista.
Tilaisuš mäni lämpimäššä ilmapiirissä. Kuuntelomah luventoja keräyty täyši šali ta hyö kaikin vuotetah uušie vaštautumisie ta kantakanšojen perintehistä ta kulttuurista pakinoja.