“Mägriän karjalazien” projektu voitti Ven’al piettäväs kilvas
Moskovas 20. syvyskuudu juattih palkindot Ven’an initsiatiivizen budžietan projektoin viijenden kilvan voittajile. Voittajakse rodihgi projektu Anuksen piirispäi, kuduan todevutti Mägriän karjalazet -alovehelline yhteiskunnalline ičehalličus. “Mägriän karjalazien” projektan mugah Mägriäh avattih Kalitka-kulinuariistuudii.
Kaikkiedah kilbah yhtyi 914 projektua Ven’an eri čuppuloispäi. Karjalaspäi kilbah työnnettih 12 ilmoitustu Belomorskan, Kondupohjan, Karhumäen, Anuksen, Pitkänrannan, Onieganjärven, Priäžän, Puudogan da Suojärven piiris da Petroskoispäi.
– Projektan hantuzis pandih kundoh vahnu kodi, kuduah sit avattih kudomizen da omelemizen pajat da kulinuariistuudii. Stuudies rahvastu gostitetah karjalazil šipainiekoil da liemel joves da järves suadulois kalois. Gost’at voijah oppie pastua šipainiekkua da varustua muudu perindöllisty syömisty da juomistu, kirjutettih Karjalan portualas.
Kilbu pietäh Ven’an finansoinministerstvan tiedotutkimusinstituuttu.
