KV-šoun päidejan om popul’arizoitta vepsän da karjalan rahvahan kul’turad. Uz’ vipusk om omištadud Petroskoin parkoile, i se täuzin om tehtud vepsän kelel.
Projektan vedäjad Karjalan Rahvahaližen teatran arvostadud artistad karjalaine Ondrei Gorškov da vepsläine Aleksandra Aniskina jatktaba tundištoitta kacujid Karjalan pälidnan melentartuisijoidenke. Uden vipuskan videorolik om omištadud lebusijoile – puištoile, parkoile. No necen vipuskan päerigoičusen om se, miše videorolik täuzin om tehtud vepsän kelel.
— Mö navedim eksperimentiruida žanroidenke, idejoidenke. Amu jo tahtoim tehta kogonaižid vipuskoid Karjalan rahvahaližil kelil. Ondrejale tuli mel’he panda muštho vepsläižid sanoid. Tulijal aigal tahtoim tehta vipusk täuzin karjalan-ki kelel, sanub Aleksandra.
KV-šoud tehtas jo läz pol’tošt vot. Ezmäine vipusk läksi eloho 2021. voden sügüz’kus. Projektan tegijad tundištoitaba kacujid Karjalan erazvuiččiden agjoiden čomiden sijoidenke, starinoičeba necen man igähižiden rahvahiden kul’turas.
Uzištoid neciš temas voib lugeda mugažo venäks.