Kultani kantele -nuottikokomuš viisikielistä kannelta varoin näki päivänvalon. Painokšen esittely vietettih Karjalan tašavallan kanšojen yštävyštalošša.
Verso-kuštantamon julkaisoma Kultani kantele-nuottikokomuš näki päivänvalon.
Kirjan luatijina ollah etnomusiikin tutkijat Ol’ga Vlasova ta Tatjana Trunova.
— Kokomuš on yštävyön ta luovan yhteistyön tuloš. 20 vuuvven aikana Tatjana Trunova iččenäisešti harrašti šoittuo viisikielisellä kantelella. Šentäh Karjalašša viisikieliesen kantelen šoitto on kehittymisvaihiešša piättimä käyttyä hänen tärkietä kokemušta ta vetyä šitä yhteh kirjašša. Painoš rupieu toimimah karjalaisien, vepšäläisien ta šuomelaisien kulttuurin hyväkši, korošti Ol’ga Vlasova.
Kultani kantele -kokomuš yhistäy 26 perintehellistä ta luatijan šäveltä viisikielistä kannelta varoin.
— Kokomukšešša on kolme ošua. Niissä on esitetty eri šoittamiskeinoja ta niijen yhisselmä rippuon šoittajan meštaruon tašošta. Šävelet on pantu helpoista monimutkasih, kerto Tatjana Trunova.
Kirjašša on niise QR-koodit, kumpasen annetah linkkijä videomuasteri-oppiloih.
Esittelyššä kaččojat šuatih omin šilmin nähä Tatjana Trunovan näyttämie esittämiskeinoja ta kuunnella kaunista kantelen šoittuo.
Kultani kantele -nuottikokomuš julkaistih Karjalan marilaiset -kanšalaisjärještön Karjalan kanšojen kulttuurin aakkoset -projektin rajoissa Karjalan tašavallan piämiehen granttišiätijön kannatukšella. Kokomušta levitetäh ilmasiksi.