Kotkatjärveläzet aktivistat täytty vägie varustutah suureh pruazniekkah. Tavan mugah vahnemban polven rahvas pannah kundoh Kotkatjärven lohkol olijoin mustomerkilöin kohtat.
– Myö jo kabrastimmo velleskalman da mustomerkin paikan, keskihierun pihat da kluuban rinnal pyhkimmö kai lijat jälles talvie. Školas lapset opastutah lugemah Voitonpäiväle omistettuloi runozii da piirustetah čomazii pruazniekakse. Nerokkahimbat runoloin lugijat lähtietäh ruavahien kel ajamah mašinal da avtoubusal 5. oraskuudu mustomerkilöillyö. Tänävuon tahtommo ajella mašinoil Verhn’oih ‒ sie on uuzi mustomerki da kävymmö muzeih, sit ajammo Torasjärveh, kabrastammo velleskalman da Koverih vie kävähtämmös, kus oli voinan aigua suomelazien luageri. Lopemmo ajeluksen Kotkatjärves suuren velleskalman da mustomerkin luo. Joga sijas myö kabrastammo mustopaikat, olemmo kodvaine vaikkani da luvemmo Voitole omistettuloi ronozii, sanou kotkatjärveläine Valentina Bukina.
Samannu piän, 5. oraskuudu, rodieu vastavus mustokujon rinnal “Minun did’oi ‒ Urhomies”. Lapset da vahnembazet sanellah omis didölöis, kuduat tuldih jälles voinua Kotkatjärveh. Mustokujos on 87 Kotkarjärven veteruanoin kuvua ‒ heih niškoi ruvetahgi sanelemah.
Oraskuun 7. päivänny kluubas roih ižänmuan suvaiččijoin pajokilbu, kus školan opastujat, opastajat da vie toizet pajojoukot ruvetah pajattamah voinan pajoloi.
Voitonpiän, 9. oraskuudu, hierulazet kerävytäh mustomerkin da velleskalmalluo. Huondeksel roih sluužbu ‒ pappi panou malitun.
– Jälles miitingua myö tahtommo kluuban pihas järvirannas pajattua voinan pajoloi, syöttiä kaikkii saldatan kuašal, juottua hiilaval čuajul piirualoin kel, kuunnella da tansuija voinan valsii, sanou Valentina Bukina.