“Kipinä” valmistautuu Uuteh vuoteh
Uuši vuosi on jo kynnykšellä. Kuvalehen numerošta šie löyvät pruasniekalla omissettuja šivuja: luvet L’udmila Barhatovan Kuuši-kertomukšen ta L’ubov’ Baltazarin Talven algu – vuvven loppu -runoja šekä luajit kaunehista kuvista girl’andan uuvvenvuuvven kuušeh.
– Uuvven “Kipinän” korissukšena on vuuvven 2022 kirkaš ta kaunis kalenteri, kumpasen piirušti Ol’ga Ikkonen. A lehen kanšikuvina ollah “Kipinän” 35-vuotispäivällä omissetun Hyvittelykortti-kilpailun voittajien Anni Filippovan ta Alisa Kisel’ovan piiruššukšet, kertou “Kipinän” toimittaja Maikki Spitsina.
Šamoin kuvaleheššä šie löyvät mukavie starinoja šiitä, kuin puola ta omena tultih yštäviksi šekä Iivanašta ta viisahašta lampahašta, luvet runoja elukoista, šuat tietyä ken peittäytyy Mečänisäntä-nuamijon alla šekä äijän uutta karjalaisista rekilöistä. Šen lisäkši “Kipinäššä” on mukava tietokilpailu, šanarissikkö karjalaisešta puvušta XII vuosišualla šekä tietoja nenä-šanan viiještä merkitykšeštä.
Kuvalehen toimittajat vuotetah “Kipinäh” uušie kirjuttajie ta lukijie, taiteilijie ta kuvuajie.
