KIŽI SKI x-Race -hiihtomarafoni keräsi 39 ošallistujua Venäjän eri kaupunkiloista, heistä 37 piäsi loppuh šuaten. Tämä on extreme-marafoni, šentäh kun šiä ta lumipeiteh voipi tuuvva vuottamattomie vaikeukšie. Tänä vuotena 61-kilometrisen matan hiihtäjät šuoritettih oikein pahua jiä- ta lumipeitehtä myöten, oli lumini ta vetini kel’i.
— Tämä urheilutapahtuma tarkistau ihmisen mahollisukšie. Še on tovellah pitkä matka ta ošallistujalla ei ole mahollisutta myöštyö takasin. Še opaštau ymmärtyä, jotta luonnon voima on kaikešta voimakkahin ta pitäy šuoštuo šiih. Tämä marafoni on kuot’t’eluš ošallistujilla ta järještäjillä, šelitettih marafonin järještäjät.
Miehien kešen enšimmäisekši tuli Sergei Dolbunov Rumjantsevošta, hiän hiihti marafonin komešša tunnissa 42 minuutissa. Toisella paikalla oli Ivan Selivanov Murmanskista ta Sergei Mitrošin Insar-kaupunkista.
Tänä vuotena enšimmäistä kertua marafonin istorijašša naiset šuoritettih koko matan loppuh šuaten, heistä nopeimpana oli Aleksandra Merkulova Obninskista, hänen hiihtomatka šuarelta Petroskoih kešti 4 tuntie 25 minuuttie. Toisella paikalla piäsi Ol’ga Borodulina Petroskoista ta kolmannella Emilia Larieva Sortavalašta.
— Miušta, še oli mukava ajatuš järještyä hiihtoajo Onegan järvellä. Viime vuotena miula ei onnistun hiihtyä marafoni loppuh, šiä oli oikein paha ta 73 kilometrista mie hiihin 53. Šentäh tänä vuotena še oli revanšši. En tykkyä jättyä ruavot tulokšetta. Ka tänä vuotena šiä valmisti uuvvet vaikeukšet. Mie en nikonša hiihtän šemmoista kelie myöten. Piti kaččuo minne ajua, eččie tašasie paikkoja, pityä tašapainuo. Kerran mie kuiteski lankesin ta jouvuin kylmäh veteh, mi oli lumen alla jiällä, ka hyvä on, jotta še tapahtu jo loppušuoralla. Noušin ta hiihin ielläh. Toivon, jotta tämä ei ollun viimeni kerta, kerto omie mielikuvie marafonin voittaja naisien kešen Aleksandra Merkulova.
Viimeni marafonin ošallistuja tuli loppuh, kun pihalla oli jo pimie. Hänen hiihtomatka kešti yli kahekšan tuntie.
Marafonin järještäjien joukon šuunnitelmissa on jatkua viettyä marafonie. Hyö ollah varmoja, jotta enši vuotena še niise tulou unohtamattomakši.