Kiži avasi uuvvet tilat
Kižin ulkomusejon Lapšien musejokeškuš on avannun oveh peruškorjaukšen jälkeh. Uuvvissetut nykyaikaset tilat šijottauvutah entisen semstvon šairalan vanhašša rakennukšešša Petroskoin istorijallisešša linnannelliköššä.
— Multimediatila upottau kaččojan meijän šeuvun istorijah. Matka Oneganiemellä -peli tuttavuššuttau Kižin šuaren ta Oneganiemen istorijah, eläin- ta kašvimuajilmah. Mielenkiintoni piirrošfilmi Kižin tarinat kertou eri tapahtumista, kumpaset tapahuttih 1600—1800-luvuilla Oneganiemen alovehella. Filmi tuttavuššuttau niise perintehellisih käsityöammattiloih, kertou Lapšien musejokeškukšen ošastopiällikkö Marina Kočetigova.
Muissa tiloissa toimitah nyt studijot. Toisešša tilašša lapšet tutuššutah šemmosih ammattiloih, kuin restaurattori, musejovahti ta musejonhoitaja. Toini on tarkotettu teatteristudijolla. Täššä tilašša avatah näyttelyjä ta luajitah esitykšie. Nyt tilašša on esillä interaktiivini näyttely KiziMua (0+), kumpani toimiu kulujan vuuvven loppuh šuaten.
Rakennukšešta löytyy niise tila, kumpasešša järješšetäh työpajoja ta musiikkituntija.
Uuvvissettuih tiloih vuotetah šekä lapšie jotta aikuhisie.
Lapšien musejokeškuš on peruššettu vuotena 1993. Šen projektit ta ohjelmat tuttavuššutetah lapšie ta aikuhisie istorijalliseh ta kulttuuriperintöh.
