Karjalan lakienhyväkšymisissunnon järještämä kulttuuri- , huvituš- ta opaššušohjelma piätty tänäpiänä. Netälin aikana Luganskin kanšantašavallan lapšet tuttavuššuttih Karjalan ammattiopistoih, kulttuurilaitokših, nähtävykših, tutuššuttih šamanikäsien lapšien kera.
Ennein kotihlähtyö hyö vaštauvuttih lomamatan järještäjien kera Karjalan lakienhyväkšymisissunnon salissa ta kerrottih omista vaikutelmista.
— Oli oikein mukava nähä Kižin šuaren piäkirikköjä ulko- ta sisäpuolelta. Matka Onegajärvie myöten šinne ta takasin niise oli kiinnoštava. Petroskoissa myö šaima nähä Karjalan kanšallisen šoittimen kantelehen, šillä kaunehešti šoitettih šamannimisen ansamblin musikantit. Koko tämä matka jiäy muistih, Karjala on kaunis mua, šillä on rikaš istorija, kerto koululaini Luganskin kanšantašavallan Slavjanoserbskin piiristä Jaroslav.
Matan aikana erikoista huomijuo annettih tutuštumisella koulutušsistemih. Lapšet ošallissuttih Karjalan opistojen järještämih muasteri-oppiloih ta šuatih tiijuštua mih ammattih voipi opaštuo Karjalašša.
— Myö tahtoma näyttyä heilä opaššušsistemie, šentäh kun hyö ollah jo ammattivalinnan kynnykšellä. Niise oli tärkie antua heilä mahollisuon šeuruššella opistojen opaštujien ta opaštajien kera. Šuurempana lahjana meilä oli, konša lapšet ruvettih muhimah. Ohjelman avulla myö antoma heilä kaunehutta, ihmislämpyö ta tavallisie elämäniloja, kumpasien palasie hyö otetah mukah kotih, missä šitä oikein tarvitah, šano Karjalan lakienhyväkšymisissunnon opaššuš-, urheilu- ta nuorisopolitiikan komitietan johtaja Galina Gorelikova.
Matan lopušša lapšet šuatih muistolahjoiksi Karjalašta kertojie kirjoja, valokuvaal’pomie ta šuojeluesinehie. Karjalan kevätloman järještäjät toivotettih hyvyä kotimatkua ta lisättih, jotta ois iloista vaštautuo uuvveštah Karjalan mualla.
Aihiešta voit lukie niise šuomekši.