Petroskoissa 24. šyyškuuta Karjalan muanviljelijien jarmankan rajoissa pietäh Kekrin päivyä. Pruasniekakši valmissettih teatteriesityš, kumpasen piäšankarina on karjalaisen mifologijan hahmo — Kekri.
— Meijän tarkotukšena on kertuo, mi on Kekri, mitein piettih pruasniekkoja, kun koko šato oli korjattu ta mimmoset kotityöt alettih šen jälkeh. Tahomma niise tuttavuštua pruasniekan vierahie Kekripäiväh liittyjih perintehih, šano Karjalan kanšallisen ta alovehellisen politiikan ministerijön kantakanšojen kannatušošašton johtaja Jelena Migunova.
Pityä Kekripäivyä Petroskoissa on Karjalan piämiehen ehotuš. Še pantih Karjalan tuottehien jarmankan ohjelmah. Jarmankašša voipi oštua kašvija, maito-, kala-, leipätuottehie ta niise mettä. Jarmankan järještäjänä on muataloušministerijö, kehitykšen korporatijo ta Petroskoin hallinto. Teatteriesitykšeššä Kekrin hahmon kera esiintyy Karjalan pihan emäntä.