Kalevalan piirin sosiali-talouškyšymykšistä ta proplemoista keškuššeltih Karjalan piämiehen Artur Parfenčikovin pitämäššä kokoukšešša. Tänä vuotena Kalevalašša šuunnitellah pityä Tašavallan päivän pruasniekka. Valmistelu šiih on yksi piirin nykytärkeimmistä kyšymykšistä.
– Kalevalašša vielä viime vuotena korjattih teitä, mualattih pos’olkan keškikatujen vanhojen talojen šeinie, kunnoššettih erilaisie yhteiskunnallisie paikkoja, šano Kalevalan piirin hallinnon johtaja Valentina Bulavtseva.
Piirin tärkiempänä proplemana ollah autotiet, kumpasie myöten tuuvvah ruokua pos’olkah, ajetah matkuštajat ta piirin eläjät. Niitä aina pitäy hoitua šekä pitäy parentua autobuššikuletušta piirin elinpaikkojen välillä.
Kalevalašša niise 12 vanhan talon eläjät vuotetah uušie kortterija, šekä halutah rakentua uuši päiväkoti. Piirihallinnošša toivotah, jotta päiväkoin rakennušfirma löytyy ta šeki voit rakentua uuvven talon. Šen lisäkši Borovoi-pos’olkašša šuunnitellah rakentua uuši pannuhuoneh ta Luušalmen eläjät vuotetah monitoimikeškušta, kumpani pitäy rakentua palannuon koulun paikalla.
Karjalan piämieš korošti, jotta ratkaista rakentamiskyšymykšie Kalevalašša on vaikieta ta kallista, šentäh kun pos’olka on loittona ta šiinä ei ole rautatietä, ka kuitenki lupasi, jotta ne ratkaissah.
Kaikkien sosialikyšymykšien lisäkši keškuššeltih ni turismin kehitykšeštä: viime vuotena oli allakirjutettu šopimuš uuvven turismipaikan rakentamisešta Kalevalan lähellä. Toivotah, jotta še voit ottua vaštah noin 100 tuhatta turistie joka vuosi.