Karjalaine inehmine ruadau SKOLKOVO:n johtamisškolas
Videlen kyläh rodivunnuh karjalaine neičyt Aleksandra Kornilova sygyzys algajen hivuou omua virguporrastu Moskovas Ven’an kuulužimas tiijonkandaizes biznesškolas SKOLKOVOs.
Kornilovan ruado on ilmoihpiästäi toimittai. Häi toimittau tiijon-da biznesalazii tekstoi da kehittelöy opastunduprogrammoi. Naine loppi Piiterin valdivonyliopiston da ruadoalua myöte on lehtimies.
Kornilova Moskovas eläjes on hyvin tiedoine meijänpuolizis uudizis. Häi kaččou ”Viestit Karjala” -programmua, lugou resursizen mediakeskuksen da Karjalan Kielen Koin uudizii.
— Tahtozin pyrrittiä kaikkii karjalazii, kudamat eletäh Karjalan tazavallas dai sen ulgupuolel: paiskua karjalakse omien vahnembienke, buaboloinke da died’oloinke, kenenke vie vai suau. Kyzelkiä heidy heijän lapsestusaijas, mennyös aijas da pangua net kai tallele diktofonal. Uskokkua, tulou se päivy, konzu oman iäni rodieu kuldua kallehembi, a händy rinnal jo ei rodei.
Kornilova kalleksiu omua alguperiä da suguroduu, luadiu oman perehen sugupuudu, kudamas täkse aigua on läs sada kaksikymmen nimie. Häi hinnastau Videlen kyläh rodivundua, karjalazii taboi da karjalan kieldy.
Natalja Antonovan pagin Aleksandra Kornilovanke Omas Muas 24. kylmykuudu da täs.
