Kalagen etnokeskuz da etnopark ezitadihe Krasnojarskas
Krasnojarskas mäni Regionankeskeine Venäman Pohjoižen, Sibirin i Edahaižen päivnouzman igähižiden vähäluguižiden rahvahiden etnokul’turižiden keskusiden radon kacund. Jo äi vot Etnokacundan pätegend om oigetud sihe, miše udessündutada vähäluguižiden rahvahiden tradicionaližid kal’huzid.
Etnokacundal vastsihe etnokeskusiden ohjandajad, mastarid da taidehpirdajad, sädaikollektivad kümnes Venäman agjoišpäi. Karjalad ezitiba Vepsän kul’tursebran pämez’ Larisa Čirkova i sebran ühtnik Natalja Silakova. Hö starinoičiba ”Värtin”-etnokeskuses da ”Kalarand”-etnoparkas, miččed om tehtud Änižröunan Kalag’-küläs, jagoihe ičeze mahtištol vepsän kelen da kul’turan kaičendas da kehitoitandas.
— Tämbei om tärged, miše vepsläižel norištol oliži oiged mel’kuviteluz vepsläižiden elos, tradicijoiš da veroiš. Pidab ozutada norile, miše tedoid ezitatoiden kelen da kul’turan polhe om heiden bohatuz, mitte pidab kaita ičeze kanzas i antta se toižile sugupol’vile, sanub Larisa Čirkova.
Kul’turjäl’gendusen objektad oma tarbhaižed rahvahiden kul’turan da kelen kaičendan täht, ned abutaba kehitoitta elotahoid ottes homaičusehe niiden etnokul’turižid erigoičusid. Tämbei etnokeskused da etnoparkad oma popul’arižed ei vaiše meiden valdkundan eläjil, no susedregionoiš-ki.
