Eloho läksi kaks’ openduzkirjad kahesanden i ühesanden klassoiden täht. Openduzkirjoiden avtor om Suomalaiž-ugrilaižen školan vepsän kelen opendai Nadežda Petrova. Nügüd’ vepsän kelen urokoiden täht oma kaik nügüdläižed openduzkirjad ezmäižespäi uhesandehesai klassahasai.
— Om lujas hüvä, miše tehtihe völ kaks’ openduzkirjad. Nügüd’ vepsän kelen opendajile linneb kebnemba opeta lapsid kodikel’he, sikš ku ende mö iče ecim materialoid, tekstoid urokoiden täht, vaumičim tegendoid vepsän kelen grammatikan mödhe, sanub Kalagen školan vepsän kelen opendai Maria Mironova.
Nügüdläižed vepsän kelen openduzkirjad oma čomad i kirjavad. Niiš om äi tekstoid, runoid, erzvuiččid melentartuižid tegendoid, lopus om anttud tablicad vepsän kelen grammatikan mödhe.
Johtutam, Karjalas vepsän kel’t opetas nelläs školas: Änižröunan Kalagen, Šoutjärven, Šokšun i Petroskoin Suomalaiž-ugrilaižes školiš. Lapsed opendaba vepsän kel’t ezmäižespäi ühtendehetoštkümnehesai klassahasai.