Toini kanšainvälini konferenšši “Kakši kulttuurie — yksi kotimua” alkau tänäpiänä 19. elokuuta klo 11 Lihoslavlin kulttuurikeškukšešša. Ošanottajat eri paikoista esitetäh karjalan kieleh ta kulttuurih liityjie tutkimukšie ta toiminnan tulokšie.
— Enšin kaikki otetah ošua yhtehiseh issuntoh, a šiitä myö juamma ošallistujie kuuteh ošaštoh, kumpasien teemoina ollah karjalan kieli ta kirjallisuš, Tverin alovehen henkilöitä ta heijän rooli istorijašša, kanšankulttuuri, kulttuuriperintö nykyaikasešša elämäššä, karjalaisien taival ennein ta nykyjäh, nuorien ihmisien tutkimukšie, šelitti konferenššin järještäjä Marina Kamrikova.
Konferenšši pietäh Karjalaisien šiirtymisen Tverin alovehella 405-vuotisjuhlan rajoissa.