Kulttuuriministerön myöntämä nimi “Karjalan šielu” šai Kalevalan kantelešoittaja Jurii Gladišev. Kunnivonimi myönnetäh omatoimisen taijon šuavutukšista.
— Ekspertit oltih šamamielisinä kyšymykšeššä, ken šuau tämän nimen. Jurii Gladišev on Kalevalan piirin klubisistemin kantelešoittajien yhtyvehen johtajana jo 31 vuotta. Hänen opaštajapanoš yhtyveheh on tovellah šuuri ta merkittävä. On anšijollisešti antua tämä nimi hänellä, šanottih Kulttuuriministerijön etuštajat.
Palkinnon šuamisen toviššuš juhlallisešti myönnetäh tämän vuuvven 22. talvikuuta.
Jurii Gladišev johtau Kantelehen šoittajien yhtyvehtä 31 vuotta. Hänen opaštajapanokšen anšijošta šillä oli myönnetty Kanšanyhtevehen kunnivonimi.
Kalevalan kantelehella šoittajat rikehen käyväh esityšmatoilla ta šuahah mäneššyštä luovissa kilpailuissa. Niise Jurii Aleksandrovič on aktiivini piirin luovan elämän vaikuttaja. Šoittajan opaštujat ollah kiitolliset muasterilla ta šäilytetäh lämpimie tuntehie opaštajalla, yhtyvehen piäštökkähien joukošša on neki, ket jatkuttih šoittua kantelehella ammatillisešti.
Aihiešta voit lukie niise šuomekši.