Kešäkuun 15. päivänä enšimmäini mukava Orlan-juna läksi Lentierašta Šukkajärveh ta Koštamukšeh. Täštä kerto omalla VK-šivulla Karjalan piämieš Artur Parfenčikov.
Juna rupieu kulkomah ympäri vuuvven joka enšiarki ta serota. Še lähtöy Lentierašta viijeltä huomenekšella, a Koštamukšešta kuuvvelta illalla. “Orlanin” kokonaismatka-aika on 5 tuntie ta 50 minuuttie.
– Šen lisäkši heinäkuušša Orlan-juna yhistäy Koštamukšen kaupunkipiirie Belomorskin piirih. Še rupieu kulkomah Koštamukšen, Kočkoman ta Belomorskin välillä. Niin tunnetut Vienanmeren kallivopiirrokšet ta meren rannikko tullah helppopiäšysiksi tašavallan monilla eläjillä, kirjutti piämieš Artur Parfenčikov omalla VK-šivulla.
Piämiehen šanojen mukah, konša valmissetah tarvittava rautatie-infrastruktuuri, ni Orlan-juna šuau kulkie šamoin Louhen ta Piäjärven välillä.
Aihiešta voit lukie niise šuomekši.