Tänä vuotena täytty 95 vuotta Carelia-kuvalehen enšimmäisen numeron julkaisušta. Merkkitapahtumalla oli omissettu uuvven numeron esittely, kumpasešša kerrottih numeron piäteemoista ta esiinnyttih lapšien šuomelaini kuoro “Lastepiiri” šekä marilaini folkloriyhtyveh “Šuldir”.
Numeron piäteemana oli Sonja Nikitinan artikkeli Osmo Borodkinista. Še on šuuren monivuotisen tutkimušruavon tuloš, kumpasen tavotti Kanšallisen musejon spesialisti, istorikko, Sonja Nikitina yhteisruavošša Karjalan kanšallisen arhiivan ta taitomusejon kera.
— Voin šanuo, jotta tämä artikkeli on enšimmäini niin täyvelli Osmo Borodkinin elämäkerta. Šiinä on äijän tarkkoja yksityiskohtie ta lisäkši tekstie täyvennetäh Borodkinin valokuvie ta kuvataitoruatoja, šano kuvalehen piätoimittaja Armas Mašin.
Musiikkinumerot oltih ei šattumalta valittu. Ne košetah numeron teemoja: toini kertou Lastenpiiri-kuoron vuotisjuhlašta ta toini Karjalašša eläjien marilaisien kulttuurista ta heijän kotimuašta Mari El -tašavallašta.
Esittelyššä oli onnitteluja “Carelian” nykysillä ta entisillä toimittajilla, toivomukšie jatkua eččie teemoja ta kirjuttua šamoin mukavie artikkelija.
Carelia-lehen uuši numero voipi oštua Periodika-kuštantamošša.