Vihod-mediakeškukšen entisen tilah avautuu Karjalan taitomusejoh kuuluja uuši Art-Prospekt -näyttelytila.
— Entini Vihod-mediakeškuš iellähki rupieu toimimah näyttelytilana. Nykyjäh še kuuluu Karjalan taitomusejoh. Art-Prospekt -nimi ei ole šattumaini. Meijän tarkotukšena on kaččuo tulovaisuoh, a “prospekt” tarkottau perspektiivie, tulovaisutta ta šen näkömistä. Tila auttau meitä esittyä enemmän näyttelyesinehie musejon varaštoloista, kerto Taitomusejon johtaja Varvara Lebedeva lehistökonferenššissa.
Art-Prospekt -näyttelytila rupieu toteuttamah taito-ohjelmie 14—21-vuotisilla ihmisillä. Tilan piätarkotukšena on vetyä nuorisuo Karjalan taijon kehittämiseh.
— Tilašša vietetäh eri tapuamisie, luventoja, muasteri-oppija, näyttelyjä, väittelyjä. Piäaiheina ollah nakytaito, nykyaikaset taitomarkkinat, taijon istorija, šelitti “Art-Prospektin” johtaja Ol’ga Bahilina.
Enšimmäini Art Prospekt. Karjalan innoššuttama taito -nimini näyttely avautuu 10. kešäkuuta. Šinä päivänä näyttelytila alkau ottua vaštah kävijie. Näyttelyn alkuhpanijana on ECHO-liitto.
— Haluomma näyttyä, mitein taiteilijat, muasterit ta disainerit nähäh Karjalua ta šen kulttuurikoodie, mitein ilmennetäh šitä omissa tevokšissa. Esitämmä huonehtarpehie, kaunissušesinehie ta äšen käsin valmistamua kosmetiikkua. Karjalašta voipi tuuvva hyövyllisie ta käytännöllisie esinehie. Lisäkši näyttelyn tarkotukšena on näyttyä taiteilijien meštaruon kašvuo, šano ECHO-liiton johtaja Svetlana Kol’čurina.