Aktijo: Kirjaštojen yö kertou perintehistä
Karjalan kirjaštojen 11. aktijon teemana on “Yhissyš on erikoisuošša”. Kirjaštojen yö -aktijo alkau jo tänäpiänä Karhumäješšä ta loppuu šuovattana — tapahtuman piäpäivänä.
Karjalan piirien kirjaštoissa pietäh näyttelyjä, luovie iltoja, muasteri-oppija. Esimerkiksi, Sortavalan kirjaštošša varjoteatteri esittäy Kuret-spektaklie karjalan kielellä, Kalevalašša pietäh karjalaisien sriäpnöjen muasteri-oppie ta leikkiohjelmua, a Belomorskissa – kirjallisustilaisuš.
Rikašta ohjelmua valmistau Karjalan kanšallini kirjašto — tašavallan aktijon piäpaikka.
— Kirjašto tariččou erilaisie mukavie tilaisukšie eri-ikäsillä ihmisillä. Ohjelma alkau šuovattana kahelta. Myt piemmä opašretki kirjašton ošaštojen myöten ta avuamma ovet kirjojen varaštoih. Še on ainutluatuni mahollisuš nähä mitein kirjoja šäilytetäh. Šiitä alkau muasteri-oppien šarja eri-ikäsillä lapšilla, a piäohjelma alkau viijeltä, kerto Kanšallisen kirjašton lapšien keškukšen etuštaja Vladimir Maksimkin.
Kanšallisešša kirjaštošša šuau käyvä tapuamiseh taiteilijan Dmitrii Dmitrijevin ta etnobloggerin Tatjana Berdaševan kera ta tiijuštua runojen šankariloista, kuunnella Jelena Soinin runoja, kävellä entistä Sobornaja-katuo myöten ta kuunnella kertomukšie istorijašta. Täyši ohjelma on esillä kirjaštojen saitiloilla ta VK-ryhmissä.
