XXII Giperboreja oli omissettu starinoilla
Männyönä netälinloppuna Petroskoin rantakavulla šai nähä vetehistä, voimamiehie, kultaista kalua, hyvie ta pahoja šankarie. Jiä- ta lumiveššokšien festivali “Giperboreja” on ihmehellisih kaupunkitapahtuma. Tänä vuotena valittu teema lisäsi festivalilla taikua.
— Netälinloppuna yli 15000 vierašta oli rantakavulla. Jiä- ta lumiveššokšien ulkoilmanäyttelyn valmistamiseh ošallistu 87 muasterie. Hyö luajittih 10 veššošta lumešta ta 20 jiäštä. Oli käytetty 66 tonnie jiätä ta 35 kuutijuo lunta. Festivalin keškitapahtuman lisäkši oli järješšetty konsertti, leikkien ta huvitukšien ohjelma, šanottih Petroskoin hallinnošša.
Festivalin piälavalla piettih Kulaset veräjät -konserttiohjelmua. Kalaštajat voitih ošallistuo jiäkalaššuškilpailuh, lapšie varoin oli äijän kisoja ta leikkie, perehet ta yštävät voitih ottua valokuvie muissokši erikoisissa valokuvapaikoissa.
Kiži-musejo perintehellisešti järještäy rikašta ohjelmua. Musejon ruatajat joka kerta kekšitäh mitänih uutta huvitušta, tällä kertua šai pelata šuureh meritaisteluh. Puukenttä pelie varoin luajittih restaurointiošašton opaštujat.
Vielä yhtenä uuvvissukšena oli “Jiäveštäjien koulu”. Šen 50 opaštuja festivalin kynnykšellä opaššuttih veistyä jiäštä. Ruavon tuloš oli esitetty Neuvoštoaukivolla.
Perintehellisešti lumiveššokšien kilpailušša on kakši nominatijuo, ka tänä vuotena šiä vaikutti kilpailuh ta järještäjät jätettih vain yksi nominatijo.
— Lumiveššokšie tänä vuotena luajittih eri tašon opaššušlaitokšien opaštujat, kumpaset opaššutah kuvataituo. Yhteh lašettuna kymmenen veiššošta luati 84 henkie, šanottih kilpailun järještäjät.
Lumiveššokšien kilpailušša Pieni kuutijo -nominatijošša voitti joukko Kontupohjašta, Dimkovon kuklani -veššoš.
Jiäveššokšien kilpailušša piälahja myönnettih Kuolomatoin Koščei -veššokšella (Piiteri, T’umen’), 1. tašon diplomin ta palkinnon šai veistäjien joukko Nižnii Tagilista, “Kolmannen kerran hiän heitti nuotan”.
Aihiešta voit lukie niise šuomekši.
