Lauluja karjalan ta vepšän kielellä, perintehellisien šävelmien šovitukšie šai kuulla eklein 21. oraškuuta Petroskoissa. Noin šeiččemän tuntie katkuamatointa muusiikkie eri tyylilöissä šoitettih Karjalan ta Piiterin joukot ta solistit: Andrei Dikojev ta Aleksandra Zabaikina, Juri Žuk ta Alina Repetskaja, ILMU, Hapanasasa, Si Ma ta Nikita Anisimov io-ryhmän kera. Niise oli runojen lukomisen oša ta Anželika Božkon luvento.
— Monikulttuurini festivali onnistu ta myö ušomma, jotta šiitä tulou perinneh. Toivon tämän tilaisuon vierahat niise tahotah šen jatkuo tulovaisuošša. Karjalašša on erittäin rikaš folk-musikin perinneh, nyt še šuau vereštä henkityštä, še innoššuttau muusikkoja šepittämäh nykyaikasta musiikkie ta še miellyttäy kuuntelijie, šano festivalin järještäjä Anastasija Orlova.
Monet festivalih tullehet kuultih nykyaikaista musiikkie karjalan ta vepšän kielellä enšimmäistä kertua ta še šynnytti elävyä kiinnoššušta. Joka esitykšen jälkeh salissa kuuluu lujie räpytykšie ta Bravo! -karjahukšie. Joukkoja ta solistija pyytettih šoittua vaikkapa vielä yhtä kappalehta.
Artistat šelitettih, mistä hyö laulettih vepšäkši ta karjalakši. Toivottovašti enši kertah salissa on enemmän ihmisie, kellä kiännöš ei enyä tarviče.