”Vepsän kel’ kaikid penembile”-projekt tegihe ”Rosmolod’ožin” mikrograntoiden konkursan vägestajaks da zavodi ičeze radon necil sügüzel. Projekt om omištadud lapsile da Petroskoin universitetan üläopenikoile, ked opendaba vepsän kel’t.
— Projektan pätegendan om ühtenzoitta kaks’ sugupol’ved – lapsid da norištod. Om tärged, miše üläopenikad voiba jagadas ičeze tedoil peniden lapsidenke, ked vaiše zavodiba opeta kel’t vai ei tuntkoi necidä, sanub projektan ohjandai, baltianmeren suomalaižiden keliden kafedran opendai Maria Košeleva.
Projektan aigan tehtas lühüdoid videorolikoid, kus üläopenikad tundištoitaba lapsid vepsänkeližidenke sanoidenke, ozutaškandeba, kus niid voib kävutada da kut vajehtada.
— Projekt ozutab üläopenikoile, miše hö voiba kävutada vepsän kel’t ei vaiše opendusen aigan, jatkub paginad Maria Košeleva.
Projekt jatktase sügüz’kuhusai 2023. Sen tegijoin om Petroskoin universitetan Norišton projektoiden da tomotusiden klub i baltianmeren suomalaižiden keliden kafedran opendai Maria Košeleva.