Tänä vuotena kanšalaisjärještöt šuahah kannatušta
On ilmotettu Presidentin šiätijön granttien kilpailun tulokšet. Niijen mukah Karjala on voittajien luvušša, ken šai rahotušta projektien alovehellisen kilpailun pitämistä varoin.
– Tänä vuotena, šamoin kuin viimesina vuosina pietäh Karjalan piämiehen šiätijön granttien kilpailu. Kilpailun 14 šuuntua varmašti šäilytetäh, šentäh kun niihi oli kyšyntyä viime kilpailušša, ta voit olla lisätäh uušie. Presidentin šiätijö anto kilpailuh 50 miljonie rupl’ua, tašavalta lisyäy vielä 50 miljonie. Rahua juatah kanšalais- ta ei-kaupallisien järještöjen kilpailušša voittanuijen projektien toteuttamiseh, šelitti Karjalan kanšallisen ta alovehellisen politiikan ministerijön kanšainvälisien, kanšalais- ta uškollisien järještöjen välisien šuhtehien ošašton spesialisti Aleksandra Čižova.
Karjalašša pakkaiskuun 1. päiväštä alkuan toimiu uuši laitoš – Piämiehen granttien šiätijö. Še rupieu pitämäh kilpailuo ta ruatua ei-kaupallisien järještöjen kera, pitämäh metodisie seminarija.
Karjalan tašavalta on parahien alovehien luvettelošša, missä aktiivisešti toteutetah projektitoimintua.
